Қазақстан-Неміс университетінің (DKU) ең үздік студенттеріне Германияның Сыртқы істер министрлігі қаржыландыратын DAAD стипендиясы арқылы қос диплом бағдарламасы бойынша Германиядағы серіктес жоғары оқу орындарында білімін жалғастыруға мүмкіндік беріледі. Серіктес жоғары оқу орындарының қатарында: Гамбург қолданбалы ғылымдар университеті (HAW Hamburg), Митвайда қолданбалы ғылымдар университеті, Рейн-Вааль қолданбалы ғылымдар университеті, Шмалькальден қолданбалы ғылымдар университеті, Вильдау техникалық университеті, Циттау/Гёрлиц қолданбалы ғылымдар университеті және Хоф қолданбалы ғылымдар университеті бар.
Қазіргі уақытта 13 DKU студенті Германиядағы серіктес жоғары оқу орындарында қос диплом бағдарламасы аясында білім алуда. 2025 жылдың сәуір айында олар Берлиндегі стипендиаттар кездесуіне шақырылды. Іс-шараны Вильдау техникалық университетінің DKU жобалық тобы ұйымдастырды.
Кездесудің бірінші күні DKU жобасының жетекшісі профессор Йенс Волленвебер студенттерді қарсы алып, таныстыру рәсімі өтті. Кейін студенттер Германия Парламентіне – Бундестагқа экскурсия жасады. Сол күні студенттер Германияда алған тәжірибелерімен бөлісіп, оқудың ерекшеліктері туралы айтты.
Келесі күні іс-шара Германия мен Қазақстан арасындағы қарым-қатынастарға арналды. Жобаның жетекшісінің орынбасары профессор Ансельм Фабиг Германия Федеративтік Республикасының Конституциясы туралы дәріс оқыды, кейін бұл тақырып бойынша пікірталас өтті. Кездесудің шарықтау шегі Германия Сыртқы істер министрлігіне бару болды. Мұнда студенттер ғимаратқа экскурсия жасап, сыртқы білім және ғылым саясаты бөлімінің жетекшісі Кристина Гельзенмен кездесті. Жанды пікірталас барысында студенттік өмір, сондай-ақ Германия мен Қазақстан арасындағы саяси және экономикалық байланыстар сияқты түрлі тақырыптар қозғалды.
